Nu sbaglio lyrics

- Cche ffaie llòco, vicchiariéllo,

sótt’a st’ àrbero assettato?

E a chi aspiétte, int’o mantiéllo

tutto quanto arravugliato? -

- Chi m’ha dato appuntamènto,

figlio mio, mo venarrà;

ccà l’aspètto, e so cuntènto:

pe ccà nnanze ha dda passà.

Ma si siénte a n’atu ppòco

na ventata frédda e fòrte,

figlio mio, scòstate ‘a llòco:

nun guardà!… Chi passa è ‘a Mòrte. -

E ‘a ventata fredda e fòrte

sciusciaie quase llà ppe llà:

e passaie, currènno, ‘a Mòrte:

e afferraje, sènza guardà.

Ah! Che strillo se sentètte

sparpetià p‘o viénto ‘e marzo!

Sulo, ‘o viécchio rummanètte:

‘o guaglióne era scumparzo…