Salvete Christi Vulnera lyrics

Salvete Christi vulnera,

Immensi amoris pignora,

Quibus perennes rivuli

Manant rubentis Sanguinis.

Nitore stellas vincitis,

Rosas odore et balsama,

Pretio lapillos indicos,

Mellis favos dulcedine.

Per vos patet gratissimum

Nostris asylum mentibus,

Non huc furor minantium

Unquam penetrat hostium.

Quot Jesus in Pretorio

Flagella nudus excipit!

Quot scissa pellis undique

Stillat cruoris guttulas!

Frontem venustam, proh dolor!

Corona pungit spinea,

Clavi retusa cuspide

Pedes manusque perforant.

Postquam sed ille tradidit

Amans volensque spiritum,

Pectus feritur lancea,

Geminusque liquor exilit.

Ut plena sit redemptio

Sub torculari stringitur,

Suique Jesus immemor,

Sibi nil reservat Sanguinis.

Venite, quotquot criminum

Funesta labes inficit:

In hoc salutis balneo

Qui se lavat, mundabitur.

Summi ad Parentis dexteram

Sedenti habenda est gratia,

Qui nos redemit Sanguine,

Sanctoque firmat Spiritu.